KOM - skólinn

KOM hefur í haust boðið upp á fleiri námskeið en áður og er greinilegt að áhugi manna á aðferðum almannatengsla fer ört vaxandi.

Námskeið um kostun hafa verið haldin í haust og verður það síðasta fyrir jól 8. desember nk. Á námskeiðinu er farið yfir hvernig nýta má kostun sem einn þátt í árangursríku markaðs- og kynningarstarfi. Um er að ræða heilsdagsnámskeið ætlað stjórnendum og öðrum þeim sem sinna markaðs- og kynningarmálum fyrirtækja og stofnana.

Námskeið um áfallastjórnun fyrir lokaða hópa hafa einnig verið haldin í haust. Þau fara þannig fram að fyrirtæki sendir hóp 5-7 manna á námskeið þar sem kennt er hvernig má bregðast við áföllum þegar þau dynja yfir, hvernig má fyrirbyggja þau og hvernig á að lágmarka skaðann sem fyrirtækið verður fyrir. Á þessu námskeiði er líka þjálfuð framkoma í fjölmiðlum.

Almenn námskeið eru opin einstaklingum og eru markmið þeirra að gera stjórnendur og starfsmenn hæfari til þess að takast á við dagleg verkefni sem hafa áhrif á ímynd fyrirtækisins og styrkja um leið tengsl við viðskiptavini, almenning og fjölmiðla.

Boðið var upp á almennt námskeið þar sem kynnt voru undirstöðuatriði í almannatengslum ásamt fjölmiðlaþjálfun fyrir Sýslumannafélag Íslands. Námskeiðshaldið hefur mælst vel fyrir og er stefnt á að halda eitt námskeið enn fyrir þennan hóp eftir áramót.

Einnig er boðið upp á sérsniðin námskeið fyrir fyrirtæki og hópa.

Til þess að fá nánari upplýsingar um námskeið hafið samband við Maríu Hrund Marinósdóttur í síma 540-8813 eða með tölvupósti til mariahrund@kom.is.

1000 tölublöð af INB

Þann 20. sept. sl. kom út 1000 tölublaðið af INB - Iceland News Briefs, sem KOM hóf útgáfu fyrir 10 árum. Fréttabréfið, sem er á ensku, er mjög sérhæft og fjallar einvörðungu um málefni sem skipta erlenda aðila, sem vilja fylgjast hér með, máli en skilja ekki íslensku. Hvert tölublað INB er 2 bls. A4 kemur út tvisvar í viku.

Meðal áskrifenda eru fjöldi erlendra sendiráða, erlend ráðuneyti, alþjóðastofnanir eins og ESB og EFTA, erlendir bankar og stórfyrirtæki, og um 250 ræðismenn Íslands. INB hefur áunnið sér mikið traust hjá umræddum aðilum og hefur haft mótandi áhrif á afstöðu erlendra aðila til Íslands. Frekari upplýsingar veitir Herdís Skúladóttir, herdis@kom.is.

Pistill:

SÁF og íslensk fyrirtæki – að tolla í tískunni

Kanadíska áróðurskvikmyndin The Corporation er eitt nýjasta innleggið í umræðuna um samfélagslega ábyrgð fyrirtækja (SÁF), sem er mjög heitt „trend“ um allan hinn vestræna heim um þessar mundir. Myndin hefur vakið mikla athygli þar sem hún hefur verið sýnd (m.a. hér á landi) og sópað að sér verðlaunum á kvikmyndahátíðum. Í myndinni er sett fram vægast sagt hörð gagnrýni á stórfyrirtæki, einkum fjölþjóðleg fyrirtæki. Því er beinlínis haldið fram að öll hlutafélög, þ.e. félög með takmarkaða ábyrgð sem eru persónur að lögum, séu í eðli sínu siðblind – virði ekki tilfinningar annarra, myndi ekki varanleg sambönd, sé sama um öryggi annarra, stundi endurteknar lygar og blekkingar til að hagnast, finni ekki til sektarkenndar og virði ekki hegðunarreglur samfélagsins. Jafnvel þótt „góðir“ menn og konur vinni hjá fyrirtækjunum, þá hljóti fyrirtækin sjálf alltaf að vera illa innrætt.

Gagnrýni á borð við þá sem felst í myndinni The Corporation er umhugsunarefni fyrir alla þá sem hafa áhuga á atvinnulífinu og tengslum atvinnulífs og samfélags. Viðbrögð fyrirtækjanna hljóta að felast í því að afsanna siðblindukenninguna með því að leggja stóraukna áherslu á samfélagslega ábyrgð. Samfélagsmál munu í framtíðinni ekki verða afgangsstærð í rekstri fyrirtækja, heldur samofin allri starfsemi þeirra. Það er ekki svo að markmiðið um hámörkun arðseminnar muni þurfa að víkja vegna kröfunnar um samfélagslega ábyrgan rekstur. Þvert á móti munu kröfur neytenda, fjárfesta og alls almennings verða til þess að samfélagsleg ábyrgð verður forsenda þess að fyrirtækin geti blómstrað og skilað hagnaði.

Hvað með íslensk fyrirtæki?
En er SÁF eitthvað sem kemur okkur við hér uppi á Íslandi? Er þetta ekki bara eitthvað sem snertir stóru fyrirtækin úti í heimi?

Svörin eru afdráttarlaust „já“ við fyrri spurningunni en „nei“ við þeirri seinni. Samfélagsleg ábyrgð fyrirtækja snertir ekki bara stóru fjölþjóðlegu fyrirtækin heldur nær niður allan skalann. Krafan sem samtíminn gerir um samfélagslega ábyrgð nær til allra skipulagsheilda í atvinnulífinu, stórra jafnt sem smárra. Þar fyrir utan eru íslensk fyrirtæki mörg orðin býsna stór, jafnvel á alþjóðlegan eða evrópskan mælikvarða, og umsvifamikil á erlendum mörkuðum.

Mörg fyrirtæki hér á landi hafa að undanförnu mótað sér umhverfisstefnu og vilja með því axla ábyrgð á sviði umhverfismála. Minna er um að fyrirtækin hafi markað sér heildstæða stefnu á sviði samfélagsmála. Hér er því verk að vinna fyrir íslenskt atvinnulíf, þ.e. ef við viljum tolla í tískunni.

Óli Jón Jónsson

Ósýnilegu viðskiptavinirnir

Því hefur verið haldið fram að „símadaman” hafi hér áður fyrr verið einhver mikilvægasti starfsmaður hvers fyrirtækis, enda rödd fyrirtækisins og sá aðili sem tók við öllum fyrirspurnum viðskiptavinarinns, leysti úr vandamálum og beindi viðskiptavinum áfram til annarra starfsmanna.

En nú er öldin önnur og ópersónulegur símsvari með ótal valmöguleikum hefur víða leyst mannlega símsvörun af hólmi og á sama tíma hefur vægi Netsins aukist til mikilla muna. Reyndar er mikilvægi Netsins og vefsíðna fyrirtækja löngu orðið það mikið að fullyrða má að það hafi í mörgum tilvikum tekið við hlutverki „símadömunnar” sem andlit og ásjóna fyrirtækja og stofnana.

Það er hins vegar ekki nóg að setja upp vef og halda að þar með sé búið að leysa samskiptamál fyrirtækisins eða stofnunarinnar til langframa. Vefurinn krefst sífelldrar endurskoðunar hvað varðar útlit, viðmót og ekki síst upplýsingarnar sem þar eru vistaðar. Í flestum tilvikum teljum við okkur vita fyrir hverja vefurinn er ætlaður en hversu aðgengilegur er hann í raun og veru fyrir þá sem þangað leita?

Gestir vefjanna eru „ósýnilegir viðskiptavinir” í þeirri merkingu að við vitum ekki hverjir þeir eru, hvers þeir leita eða hvort vefurinn hafi uppfyllt óskir þeirra. Mælingar sýna að þolinmæði fólks á Netinu er afar lítil. 80% manna yfirgefur heimasíðu og leitar annað, ef það efni sem leitað er að finnst ekki innan fimm sekúntna. Það skiptir því höfuðmáli að vefurinn sé skipulagður út frá þörfum viðskiptavinanna og auðvelt sé að rata um hann. Ráðgjafar KOM hafa mikla reynslu í því að yfirfara og endurskipuleggja vefi með það að markmiði að auka skilvirkni þeirra og arðsemi. Ekki hika við að hafa samband ef þú hefur einhverjar efasemdir um vefinn þinn.

Áslaug Harðardóttir

Herdís Skúladóttir

Sigrún Kristinsdóttir

Jón Hákon Magnússon

Liz Bridgen

María Hrund Marinósdóttir

Ólafur G. Guðlaugsson

Óli Jón Jónsson

Þorsteinn G. Gunnarsson

Póstlisti KOM
Fréttabréf KOM ehf. er gefið út að jafnaði fjórða hvern mánuð og er sent til viðskiptavina eða annarra vildarvina fyrirtækisins. Ef þú vilt ekki fá fréttabréfið sent vinsamlega sendu tölvupóst á kom@kom.is með orðinu afskrá í „subject" línunni.

Ritstjóri KOM-frétta er Herdís Skúladóttir