Sumarið er tíminn

Það er merkileg staðreynd að íslensk fyrirtæki og stofnanir gera lítið af því að nota sumartímann til að sinna almannatengslum. Á sumrin er frekar lítið um að vera í þjóðfélaginu og þjóðmálaumræðan liggur mestan part niðri. Þetta getur oft verið erfiður tími fyrir fjölmiðlamenn sem þurfa samt sem áður að fylla jafnmargar mínútur eða blaðsíður af efni. Þessi tími er oftar en ekki kallaður gúrkutíð og þá geta fréttamenn ekki verið vandfýsnir á fréttaefni (Skv. bókinni Mergurinn málsins eftir Jón G. Friðjónsson) og einmitt þá ættu fyrirtæki að nota tækifærið og koma sér á framfæri við fjölmiðla.

Margir benda á að neysla fjölmiðla sé minni á sumrin, fólk horfi síður á fréttir, lesi ekki blöðin o.s.frv. Sjálfsagt er það rétt að fólk gefur sér minni tíma til að nota fjölmiðla en samt sem áður fylgist stærstur hluti landsmanna eitthvað með fréttum. Fjölmiðlamenn þurfa að fylla sama pláss á sumrin og á öðrum tímum og því eru fréttir af starfsemi fyrirtækja sem sendar eru til þeirra líklegri til að komast að. Að öllum líkindum fá fréttirnar meira pláss og eru settar á betri stað en á öðrum árstíma. Þó að færri séu að lesa, horfa eða hlusta ná slíkar fréttir athygli og skila því fyrirtækjum árangri.

Gúrkan er tækifæri!
Það er þó ekki minni fjölmiðlaneysla sem stjórnendur setja helst fyrir sig þegar lagt er til við þá að fara í kynningarátak á sumrin, heldur virðast fyrirtækin vera hálflömuð vegna sumarfría starfsmanna. Stjórnendur segja gjarnan að ekkert sé hægt að gera á sumrin af þessum sökum. Með slíku hugarfari eru fyrirtæki oft að láta gullin tækifæri til að ná athygli sér úr greipum renna. Stjórnendur þurfa ávallt að vera vakandi fyrir tækifærum til að koma sínu fyrirtæki á framfæri og þau gerast vart betri en í gúrkutíð fjölmiðlanna.

Við hjá KOM óskum viðskiptavinum okkar gleðilegs sumars og minnum á að við verðum í allt sumar reiðubúin til að aðstoða fyrirtæki og stofnanir við að nýta sér gúrkuna.

Die Another Day!

Fáir halda því fram að auglýsingar séu eina leiðin til að vekja athygli á vörum en margir urðu undrandi þegar framleiðandi lúxusbílsins Aston Martin tilkynnti að hann hygðist ekki nota auglýsingar næstu tíu árin til að kynna bílinn.

Fólk á þó ekki að fá að gleyma hinu virta vörumerki Aston Martin. Í stað auglýsinga ætlar framleiðandinn að nota almannatengsl til að styrkja ímynd vörumerkisins. Langtíma kynningarherferð var hrundið af stað með nýjustu James Bond myndinni Die Another Day þar sem bíllinn leikur stórt hlutverk. Ákvörðun um að hætta að nota auglýsingar byggðist á þeirri trú framleiðandans að kvikmyndin, og sú athygli sem hún vekti á bílnum, myndi gera auglýsingar óþarfar.

Sú aðferð að kynna vörur í gegnum kvikmyndir nýtur vaxandi vinsælda meðal eigenda alþjóðlegra vörumerkja og hefur skapað tekjur fyrir James Bond viðskiptaveldið. Hver gleymir atriðinu úr myndinni Die Another Day þar sem Aston Martin og Jagúar bílar (bæði vörumerkin eru í eigu Ford) takast á á ísilögðu Jökulsárlóni á Breiðamerkursandi.

Margir gætu haldið að auðvelt sé að fá umfjöllun um svo þekkt vörumerki en almannatengsl ganga ekki einungis út á að fá umfjöllun heldur að fá rétta umfjöllun sem nær til ákveðins markhóps. Fyrir Vörumerki eins og Aston Martin er einnig mikilvægt að umfjöllun veiki ekki ímynd þess í hugum hefðbundinna viðskiptavina.

Herferð Aston Martin beindist að fjölmiðlum um heim allan sem fjalla um lífsstíl og neytendamál. Blaðamenn frá Bandaríkjunum, Japan, Þýskalandi og Bretlandi heimsóttu tökustað myndarinnar í Pinewood kvikmyndaverinu nærri London. Auk þess var blaðamönnum frá stærstu dagblöðum Bretlands boðið að reynsluaka Aston Martin.

Myndin vakti þvílíka athygli fjölmiðla að breska blaðið Daily Mail, sem selst í tveimur og hálfri milljón eintaka dag hvern, keypti Aston Martin Vanquish (kostar yfir 20 milljónir) til að gefa sem verðlaun í lesendakeppni og Aston Martin fékk jákvæða umfjöllun í mörgum af vinsælustu lífsstíls- og neytendatímaritum heims. En sú velvild sem skapaðist milli fjölmiðla og vörumerkisins í tengslum við þessa herferð er þó ekki síður mikilvæg.

Námskeið í almannatengslum

Kynning Og Markaður ehf. býður upp á þrjú námskeið í almannatengslum fyrir starfsmenn fyrirtækja og stofnana. Á námskeiðunum er fjallað um hvernig nota má almannatengsl til að byggja upp og varðveita ímynd fyrirtækja og stofnana. Í nútíma rekstri er góð ímynd lykilatriði og það verður að hlúa að henni á faglegan og markvissan hátt.

Námskeið í almannatengslum, samskiptatækni og fjölmiðlun er grunnnámskeið í almannatengslum og veitir þátttakendum innsýn í hvernig má nota almannatengsl í markaðsstarfi á skipulegan og áhrifaríkan hátt.

Breyttir tímar - breyttar aðstæður, námskeið í almannatengslum sem sérstaklega er hugsað fyrir starfsmenn opinberra stofnanna. Opinberir aðilar þurfa ekki síður en fyrirtæki að hlúa að ímynd sinni en áherslur eru oft aðrar og aðferðafræðin ólík.

Námskeið í áfallastjórnun fjallar um hvernig bregðast á við áföllum og hvernig stjórnendur geta undirbúið sig og sín fyrirtæki. Reglulega lenda fyrirtæki og stofnanir í hringiðu neikvæðrar fjölmiðlaumfjöllunar. Stjórnendur standa oft ráðþrota frammi fyrir kastljósi fjölmiðlanna og vita ekki hvernig á að bregðast við. Á námskeiðinu er farið yfir tækni áfallastjórnunar og hvernig hún er notuð til að lágmarka skaða á ímynd og orðspori þegar áfall dynur yfir.

Nokkur fyrirtæki og stofnanir hafa þegar nýtt sér námskeið KOM og gert að þeim góðan róm. Þeirra á meðal eru Íslandsbanki, Sjóvá-almennar, VSÓ, Iðntæknistofnun og Orkustofnun, svo einhver séu nefnd. Einnig hafa starfsmenn fjölmargra bæjarfélaga sótt námskeið, t.d. frá Akranesi, Garðabæ, Hafnarfirði og Seltjarnarnesi.
Leiðbeinandi á námskeiðunum er Liz Bridgen, ráðgjafi hjá KOM, en hún hefur áralanga reynslu af almannatengslum frá Bretlandi þar sem hún hefur unnið fyrir fjölmörg fyrirtæki og opinberar stofnanir.

Til að fá frekari upplýsingar um námskeiðin er hægt að hafa samband við Maríu Hrund Marinósdóttur ráðgjafa hjá KOM.

Innskotsblöð með Morgunblaðinu

KOM sérhæfir sig í að gefa út innskotsblöð með Morgunblaðinu og hefur gefið út fjölmörg slík blöð fyrir viðskiptavini sína. Reynslan sýnir að þetta er ódýr og áhrifarík leið til að kynna starfsemi fyrirtækja, bæjarfélaga, stofnana og félagasamtaka. Gallup hefur kannað lestur innskotsblaða fyrir KOM og þær kannanir sýna að 30% landsmanna lesa innskotsblöðin að einhverju leyti, eða um helmingur lesenda Morgunblaðsins og önnur 16% fletta í gegnum þau. Útgáfa á slíku blaði er því áhrifarík leið til að ná til mikils fjölda manna. Umsjón með útgáfu innskotsblaða hjá KOM hafa Óli Jón Jónsson og Þorsteinn G. Gunnarsson ráðgjafar.

Í febrúar sl. kom út blaðið Átak gegn verslun með konur – kemur öllum við. Blaðið var gefið út af dómsmála- og félagsmálaráðuneytinu og var markmið útgáfunnar að upplýsa almenning um þá umfangsmiklu verslun sem á sér stað í heiminum þar sem konur er seldar mansali milli landa, oftast til að þræla í kynlífs- og vændisiðnaði.

Blaðið Endurnýjanleg orka – forréttindi til framtíðar kom út í apríl. Tilgangur útgáfunnar var að fræða landsmenn um stöðu orkumála á Íslandi og á heimsvísu. Sérstök áhersla er í blaðinu lögð á að útskýra þau forréttindi okkar að geta nýtt endurnýjanlegar orkulindir í meira mæli en flestar aðrar þjóðir í veröldinni. Greint er frá þeim valkostum sem fyrir hendi eru í að beisla gufuafl og vatnsorku, vinna vetni og nýta aðra möguleika á þessu sviði. Að útgáfunni stóð Samorka, samtök veitufyrirtækja á Íslandi.

Í tengslum við Sjómannadaginn 1. júní verður gefið út Sjómannadagsblaðið og mun það verða í fjórða skiptið sem blaðið kemur út í þessu formi. Í blaðinu er fjallað um sjómennsku og útgerð og annað sem snýr að sjómönnum. Sjómannadagsráð er útgefandi Sjómannadagsblaðsins.

Það hefur verið fjallað um eitt og annað á kom.is undanfarið, t.d. ást og pólitík og hvernig er á að bregðast við áföllum.

Ást og pólitík!
All’s fair er stórskemmtileg bók sem fjallar um kosningabaráttu Bush og Clinton séð frá sjónahóli hjóna sem unnu hvort fyrir sinn frambjóðandann.

Sagan á bakvið forsíðumynd Moggans
KOM hefur á undanförnum mánuðum unnið fyrir alþjóðlega álfyrirtækið Alcoa við samskipta-, kynningar- og upplýsingamál. Eitt af því sem að KOM þurfti að sinna á dögunum var umstangið í kringum undirritun álverssamninganna á Reyðarfirði laugardaginn 15. mars sl.

Hvernig tekst þú á við áfall?
Ómar R. Valdimarsson ráðgjafi hjá KOM fjallar um hvernig stjórnendur fyrirtækja geta undirbúið sig og sín fyrirtæki undir hugsanleg áföll. Greinin birtist í Viðskiptablaðinu 19. febrúar 2003.

Markaðstorg ferðamála innanlands – Ferðatorg 2003
Þessa dagana er í fullum gangi undirbúningur fyrir sýninguna Ferðatorg 2003 sem haldin verður í Vetrargarði Smáralindar helgina 2.-4. maí nk. Þetta er í annað sinn sem sýningin er haldin en í fyrra heimsóttu hana yfir 20.000 manns og þykir sýnt að þessi viðburður er komin til að vera.

Áslaug Harðardóttir

Einar Mar Þórðarson

Herdís Skúladóttir

Jarþrúður Jónasdóttir

Jón Hákon Magnússon

Liz Bridgen

María Hrund Marinósdóttir

Ólafur G. Guðlaugsson

Óli Jón Jónsson

Ómar R. Valdimarsson

Þorsteinn G. Gunnarsson

Póstlisti KOM
Fréttabréf KOM ehf. er gefið út að jafnaði annan hvern mánuð og er sent til viðskiptavina eða annarra vildarvina fyrirtækisins. Einnig er hægt að skrá sig á póstlista KOM á heimasíðu fyrirtækisins. Ef þú vilt ekki fá fréttabréfið sent vinsamlega sendu tölvupóst á kom@kom.is með orðinu afskrá í „subject" línunni.
Ritstjórar KOM-frétta eru Liz Bridgen og Einar Mar Þórðarson.