Með hverju árinu sem líður aukast verkefni KOM utan Íslands og fyrir erlenda aðila hérlendis. Þetta er mikil viðurkenning á fagmennsku ráðgjafa KOM, en þeir hafa þurft að mæta afar ströngum kröfum um færni sem erlend fyrirtæki gera til almannatengslafyrirtækja. Í raun segir þetta að KOM gefi fremstu PR-ráðgjöfum í Evrópu lítið eftir.

Í 13 ár hefur KOM skipulagt og haldið utan um hina alþjóðlegu Groundfish Forum ráðstefnu sem haldin er í evrópskri borg í október ár hvert. KOM sá um upphaflegt skipulag og fyrirkomulag Groundfish Forum sem notað er enn í dag. Þetta er lokuð ráðstefna fyrir um 200 æðstu stjórnendur þekktra fyrirtækja í framleiðslu og sölu sjávarafurða um allan heim. Í ár verður Groundfish Forum í Munchen en var í Baracelona 2003. KOM annast val á ráðstefnustöðum, sem ætíð eru 4 og 5 stjörnu hótel. Í mars ár hvert sér KOM um Groundfish Council fund sem haldin er samhliða Boston Seafood Show.

KOM hefur annast öll fjölmiðla- og samskiptamál fyrir Alcoa á Íslandi frá snemma árs 2002, sem er afar krefjandi verkefni. Vinnan er marg flókin en jafnframt skemmtileg og gefandi. Alcoamenn hafa sagt að KOM gefi sambærilegum erlendum PR-fyrirtækjum lítið eftir og þykir okkur vænt um hrósið. KOM hefur einnig verið ráðgefandi fyrir stærsta verkfræðifyrirtæki heims Bechtel sem annast byggingu álverksmiðju Alcoa í Fjarðabyggð.
Undanfarna mánuði hafa ráðgjafar KOM auk þess unnið fyrir VISA Europe, Nokia og ýmis önnur erlend fyrirtæki.

Einnig hefur KOM unnið með mörgum þekktum alþjóðlegum PR-fyrirtækjum. Þá hefur KOM annast verkefni undanfarin ár í Bandaríkjnunum í samstarfi við almannatengslafyrirtækið Plexus Consulting Corp í Washington fyrir íslensk stjórnvöld.

Ráðstefna um íslenskan áliðnað

Áliðnaðurinn er ein öflugasta útflutningsgrein þjóðarinnar og á næstu árum mun hann festa sig enn frekar í sessi. Nýlega var haldin ráðstefna um íslenskan áliðnað undir yfirskriftinni „Ný meginstoð efnahagslífsins", þar sem kafað var til botns í ýmsum málum sem hingað til hafa orðið utanveltu í umræðu um áliðnaðinn; hver er raunveruleg staða á álmörkuðum, er álframleiðsla gamaldags, hvað sýnir reynslan okkur um áhrif álvera á atvinnulíf, er álframleiðsla sjálfbær iðnaður o.fl.?

Ráðstefnan, sem var vel sótt, var fyrsta sameiginlega uppákoma álfyrirtækjanna á Íslandi, Alcan, Norðuráls og Alcoa. Á ráðstefnunni fluttu fulltrúar álfyrirtækjanna þriggja, sem hafa víðtæka þekkingu á áliðnaði og álframleiðslu, fyrirlestra, ásamt Robert Chase sem var fulltrúi International Aluminum Institute í London. Valgerður Sverrisdóttir, iðnaðar- og viðskiptaráðherra, setti ráðstefnuna.

Til ráðstefnunnar var boðið ákvarðanatakendum í athafnalífinu, stjórnmála- og sveitarstjórnarmönnum og öðrum þeim er sérstakan áhuga hafa á áliðnaðinum. Ráðstefnustjóri var Guðfinna S. Bjarnadóttir, rektor Háskólans í Reykjavik og Björn Malmquist, fréttamaður Rúv á Egilsstöðum stjórnaði fjörlegum umræðum.
KOM sá um skipulagningu og framkvæmd ráðstefnunnar.

Afmæli KOM

Þann 18 janúar sl. hélt starfsfólk KOM upp á 18 ára afmæli fyrirtækisins, sem er elsta ráðgjafafyrirtæki landsins í almannatengslum.
Fyrirtækið var einungis fárra mánaða gamalt þegar það tók að sér stærsta fjölmiðlunarverkefni sem unnið hefur verið á Íslandi, umsjón og skipulagninu alþjólegu fjölmiðlunar- og fréttaþjónustunar sem sett var upp í tengslum við leiðtogafundinn í Höfða. Þá komu vel á þriðja þúsund fjölmiðla- og tæknimanna til landsins.

Frá upphafi hafa ráðgjafar KOM unnið með fjölda fyrirtækja og stofnana við margvísleg verkefni sem lúta að almannatengslum, ímyndarmálum og fjölmiðlun.

Mörg stærstu fyrirtæki landsins, ásamt opinberum stofnunum og samtökum eru meðal viðskiptavina KOM. Auk þess sinnir KOM verkefnum fyrir ýmsa erlenda aðila.

Samfélagsleg ábyrgð fyrirtækja

Sífellt eru gerðar nýjar og auknar kröfur um upplýsingagjöf af hálfu fyrirtækja á markaði. Að undanförnu hafa fjárfestar víða um hinn vestræna heim í auknum mæli beint sjónum sínum að ýmsu öðru í rekstri fyrirtækja en fjárhagslegri afkomu. Að baki þessari þróun býr krafan um það sem kallað hefur verið ,,ábyrg fjárfesting” ( socially responsible investment ). Sú hugmynd að fyrirtæki beri ábyrgð gagnvart samfélaginu og umhverfinu hefur náð að festa rætur meðal fjárfesta. Rætt er um að stefna fyrirtækja í samfélags- og umhverfismálum sé farin að hafa mikil áhrif á fjárfestingarákvarðanir, bæði meðal svokallaðra fagfjárfesta og almennra fjárfesta.

Hugtakið „samfélagsleg ábyrgð fyrirtækja“ ( corporate social responsibility) hefur verið áberandi í umræðum um fyrirtækjarekstur- og efnahagsmál að undanförnu. Í sumum ríkjum hefur verið rætt um að setja lög sem geri stærri fyrirtækjum skylt að birta upplýsingar, t.d. í ársskýrslu, um hvað þau leggja af mörkum til þeirra samfélaga þar sem þau eru að störfum. Er við því að búast að á næstu árum muni slík lög verða sett víða í nágrannalöndum okkar og síðar jafnvel hér á landi.

KOM hefur langa reynslu af því að veita fyrirtækjum ráðgjöf um hvernig eigi að standa að kynningu á stuðningi þeirra við margvíslega starfsemi í samfélaginu; íþróttafélög, góðgerðasamtök, sjálfseignarstofnanir, umhverfisverndarsamtök o.s.frv. Við fylgjumst vel með straumum og stefnum á þessu sviði og erum til taks fyrir þau íslensk fyrirtæki sem vilja gera það líka.

Vonarstjörnur Visa eru íþróttafólk sem á möguleika á að komast í keppnislið landa sinna fyrir Ólympíuleikana í Aþenu árið 2004. VISA EU styður þetta íþróttafólki.

Áslaug Harðardóttir

Herdís Skúladóttir

Sigrún Kristinsdóttir

Jón Hákon Magnússon

Liz Bridgen

María Hrund Marinósdóttir

Ólafur G. Guðlaugsson

Óli Jón Jónsson

Þorsteinn G. Gunnarsson

Póstlisti KOM
Fréttabréf KOM ehf. er gefið út að jafnaði þriðja hvern mánuð og er sent til viðskiptavina eða annarra vildarvina fyrirtækisins. Einnig er hægt að skrá sig á póstlista KOM á heimasíðu fyrirtækisins. Ef þú vilt ekki fá fréttabréfið sent vinsamlega sendu tölvupóst á kom@kom.is með orðinu afskrá í „subject" línunni.

Ritstjóri KOM-frétta er Herdís Skúladóttir